BAGUIO CITY – Sumaysayaat ita ti unemployement rate ti rehiyon Cordillera kalpasan a bimmaba daytoy iti 5.45% iti kaudian nga datus ti Dept. of Labor and Employment Cordillera.
Iti naangay nga Kapihan sa Baguio, kinuna ni DOLE-Cordillera nga adayu a nababa daytoy iti 14% unemployement rate a nailista idi 2020.
Kasaruno paylaeng daytoy ti panagrikkep dagiti establishimento ken negosyo gapu iti COVID-19 pandemic.
Mangnamnama pay daytoy a bumaba pay ti nasao nga datus nangruna iti in-inot a panagsubli ti operasyon dagiti establishimento ken ti Alert Level 1 a status ti kaadoan a lugar iti rehiyon.
Kinunana nga makitkitada ti in-inot nga agsubsublin ti sitwasyon iti employment rate ti rehiyon sakbay ti pandemya.
Inayonna nga adu metlaeng dagiti agingga iti agdama ket maipaspasidong iti work-from home ken dagiti negosyo wenno establishimento a limitado ti oras ti operasyon dagitoy.
Kabayatanna, pakabuklan iti 4,000 nga job seekers ti nakwalipika iti kaleppas nga Labor Day Jobs Fair a naangay idi Mayo 1.
Iti nasao a bilang, 22 kadagitoy ti hired on the spots bayat a 561 dagiti naala iti trabaho iti local employement ken 306 iti overseas.
Kangrunaan met kadagiti narecruit nga job seekers iti overseas employement dagiti nurses ken nursing aides.
Iti pakabuklan a bilang ti ahensia, nasurok iti 10,000 nga job vacancies ti indiaya dagiti 34 nga employers wenno kompanya.
Daytoy ti maikadua a gundaway a naangay ti face to face nga job fair sipod nangrugi ti pandemya idi 2020 ken mangnamnamada pay a maipatungpal manen ti aktibidad intun June 12, Independence Day ken intun Disiembre 26 ti aniberaryo ti DOLE.
