Naipasidong iti Red Alert Status dagiti amin a units ti Armed Forces of the Philippines iti National Capital Region (NCR).
Daytoy ket kaggidan ti panangipatungpal dagiti Iglesia Ni Cristo a rally iti EDSA-White Plains area idi Martes, June 1 ken ita a Mierkules.
Naipatungpal ti nasao nga addang tapno masigurado ti operational readiness ken tapno nakasagana dagiti personnel ken assets a mangipaay iti suporta no kiddawen ti civil authorities.
Mainaig iti dayta, agtultuloy ti pannakitinnulongda iti Philippine National Police (PNP) ken sumagmamano nga ahensia ti gobierno tapno maitandudo ti kinatalged ti publiko ken masigurado a saan nga agsardeng ti pannakaipaay dagiti kaskenan a serbisio.
Ipasigurado pay ti AFP nga agtalinaedda a propesional, non-partisan, ipatungpalda ti linteg, ken salaknibanda ti karbengan dagiti umili ken ti kinatalged ti pagilian.
