Manarimaan paylaeng ti panakatingiting ti kaso nga Unjust Vexation kontra kadagiti dua a babbai kalpasan a pinagsaw-an ken nilayatanda iti pang-ur ti maysa metlaeng a babae idiay Pico La Trinidad, Benguet.
Agpada nga addan iti ligal nga edad ken residente iti Km4, Pico, La Trinidad Benguet dagiti dua a suspect bayat a maysa met nga 42-anyos nga storekeeper, ken residente iti Balili La Trinidad, Benguet ti biktima.
Iti imbestigasyon dagiti otoridad, addaan iti suppiat dagiti suspect ken ti biktima seknan iti panangpataray wenno panang-operate iti maysa a panganan.
Agparparang a sinublat ti biktima ti pwesto iti eatery manipod iti suspect nu sadino, daytoyen iti nangpataray wenno nagoperate.
Nupay kasta, natumal ti nasao a negosyo rason a nagpatulong ti biktima iti maysa kadagiti kaam-ammona a mabalin a mangfinance iti daytoy.
Saan unay a nagbayag ket impakaammo ti tao ti nagpatulungan ti biktima a naiyimpaken dagiti gamit daytoy rason a nagrekep metten ti eatery iti sumagmamano a lawas.
Idi nagturong ti biktima iti nagpatulunganna tapno alaen ti susi ken ilukatna ti pwestona, binugkawan daytoy ti suspect.
Kagiddan dayta, maatap a kinuna ti suspect iti biktima a daytoy ti rumbeng a mangpataray iti nasao a negosyo.
Sigun pay iti imbestigayson, nakitungtong ken kiniddaw ti biktima nga agkalma ti suspect ngem maatap a nangisawang latta daytoy iti saan a maiparbeng ken ginandatna a dangran ti biktima usar ti piraso iti kayo.//Bombo Noveh Organo
