BAGUIO CITY – Agtaltalinaed iti Baguio General Hospital and Medical Center dagiti nadangran a 10 a pasahero ken ti driver ti para pasahero a van a nagaburan sadiay Camp 1, Tuba, Benguet idi malem kalman.
Immunan a nabigbig ti driver a ni Joseph Alis a residente ti La Trinidad, Benguet a nagsagrap laeng ti gasgas.
Kabayatanna, dagiti naiturong iti BGHMC ket da Mercedes Bravo, 53; Precila Mayumi, 20; Linalyn Jacob, 32; Vanesa Mayumi, 30; Julie Ann Ladiong, 20; Ronalie Peguerra, 20; Belinda Galiste, 19; Clifford Leoncion, 18; Joven Besa, 33 kenni Vilma Leoncion, 44, a bin-ig a residente iti siudad ti Baguio.
Naamuan a sangapulo ket walo ti linaon ti nasao a van ngem sangapulo ket dua ti naiturong iti BHMC, pakairamanan ti driver ken ti pimmusay nga estudyante a ni Izeiah Karl Jior Medalle, maysa a mechatronics engineering student.
Sumagmamano met kadagiti biktima ti naiturong iti pagagasan sadiay Rosario, La Union.
Immuna iti daytoy, pasalog ti nasao a van paturong sadiay Dagupan idi nairana a natnag ti bato ken daga manipud iti bantay ken naitupak wenno naigabor iti nasao a lugan, partikuar iti sangwanan daytoy.
