BAGUIO CITY – Pimmusay dagiti dua a mabigbigbig kas notorius drug peddlers ditoy rehiyon Cordillera sadiay Oraan East Manaoag, Pangasinan kalpasan ti naisayangkat a buy bust operation itay laeng nabiit.
Nabigbig dagitoy a da Renzell Sibelius, 32 anyos, kenni Gervin Ngina, 30- anyos agpada a tubo ti Itogon, Benguet.
Kinuna ti pulisya a malaksid iti rehiyon Cordillera ket addaanda metlang iti operasyon sadiay Pangasinan agingga iti Metro Manila.
Narekober manipod kadakuada ti maysa a cal.45 Pistol nga addaan magazine, maysa a Cal .38 revolver nga addaan bala, Empty Shells ti bala, lugan a naaramat iti transaksyon ken tallo a kilo ti maatap a napagango a bulong ti marijuana nga aggatad iti Php 360, 000.
Nupay kasta, naamuan nga iti PDEA ket awan ti nagan dagiti dua iti listaan dagiti drug personalities iti rehiyon.
