BAGUIO CITY – Narekober ti pulisya ti dua a sachets ti iligal a droga manipud iti SUV a nangdungpar iti innem a tattao sadiay Kennon Road, partikular iti Camp 4, Tuba, Benguet idi napalabas a lawas.
Sigun kenni PCI James Acod, hepe ti Tuba PNP, nasarakanda ti dua a sachets a naglaon ti marijuana leaves ken maatap a shabu iti sangwanan a paset ti nasao nga SUV.
Kinunana mainayon a kaso ti naglibas driver dagiti narekober a kontrabando malaksid kadagiti immuna a kaso daytoy gapu iti panakatay ti dua a nataengan ken panakadangrana ti uppat nga ubbing.
Inaklonna met nga agingga ita ket an-anupen pay laeng dagiti pulis ti driver a nabigbig a ni Bernard Soriano a residente ti Novaliches, Quezon City.
Naipila metten ti kaso a Reckless Imprudence Resulting in Double Homicide, Multiple Physical Injuries and Damage to Properties kontra iti suspek.
