BAGUIO CITY – Nabigbigen dagiti tallo a soldado a karaman iti napasamak a panagpalpaltog iti uneg a mismo ti Philippine Military Academy (PMA) idi malem.
Maibasar iti report ti Acting Station Commander ti BCPO Station 4, nabigbig ti suspek a ni Air Force Airman Second Class (A2C) Christopher Lim.
Nabigbig met dagiti biktima a da SSgt. Joefrey Turqueza ken SSgt. Vivencio Raton.
Maatap met a saan a panagkinnaawatan ken nabara nga argumento ti rason ti napasamak a krimen.
Maibasar iti inisyal a report, napasamak ti insidente iti maikadua a kadsaaran ti B-1022 EP Barracks sadiay PMA, no sadino, naaddaan iti nabara nga argumento ti suspek kadagiti dua a biktima.
Kabayatan ti argumento ket maatap nga inala ni A2C Lim ti issued firearm-na nga M16 rifle ken sadiay a pinalpaltoganna da SSgt. Turquesa ken SSgt. Raton a nagresulta iti maatap a dagus nga ipupusay ni SSgt. Turquesa.
Nupay natamaan ni SSgt. Raton, naki-innagaw daytoy iti paltog a nagresulta iti panakatama ti suspek.
Dagus a naitaray iti PMA Station Hospital dagiti tallo ngem naideklara a dead on arrival ni SSgt. Turquesa bayat a naiyakar iti BGHMC da SSgt. Raton ken A2C Lim.