BAGUIO CITY – Agtaltalinaed paylaeng iti intensive care Unit ti Kalinga Provincial Hospital da PSI Edward Liclic, P01 Ferdie Liwag ken ni PO1 Ferdinand Assuncion a kameng ti Provincial Public Safety Company a nadangran iti pammaltog sadiay Malusong Antonio Canao Lubuagan, Kalinga idi kalman.
Sigun kenni PSSupt. Brent Madjaco, provincial director ti PNP Kalinga, natalgeden ti kasasaad dagiti nadangran a pulis ngem sigun iti attending physician ket makaparpasar paylaeng ni Assuncion iti continues bleeding.
Kabayatanna, naiturong metten iti bukodda a balay ti bangkay da PO3 Crizaldo Lawagan, PO2 Jovenal Aguinaldo, PO1 Charles Compas ken ni PO1 Vincent Paul Tay-od.
Naamuan met nga agturong ni PCSupt. Elmo Francis Sarona, Regional Director ti Police Regional Office- Cordillera sadiay Kalinga tapno bisitaenna dagiti pulis sadiay nangruna ti pamilya dagiti pimmusay ken dagiti nadangran.
Malaksid iti daytoy, iyawatna metlaeng ti tulong pinansyal manipud kadagiti naduduma nga organisayon ken ti PNP ti pamilya dagiti pimmusay.
Kabayatanna, inlawlawag pay ni PSSupt. Madjaco nga awan ti dadduma a kadwa ti suspek a nangpaltog kadagiti pulis.
Kinunana a nangaramat ti suspek iti spray kontra iti tallo a pulis a nangipatungpal iti clearing operation sakbayna a pinalpaltogan dagitoy, ken insarunona a pinalpaltogan dagiti dadduma pay a pulis.
Maipalagip nga iserbian kuma dagiti police ti suspek iti warrant of arrest ngem limmaban daytoy a nangitunda iti ipupusay ti 4 a pulis ken ti suspek.
