BAGUIO CITY – Natalgeden ti kasasaad ti ama a naitaray iti pagagasan kalpasan a pinaltogan ti saan pay a nabigbig a suspek iti sangwanan ti maysa a panganan iti nagsabatan ti Legarda Road ken Carino Street, siudad ti Baguio idi kalman.
Sigun kenni PCI Marlo Evasco, commander ti Station 7 ti Baguio City Police Office, awan ti natamaan a napeggad a paset iti tengged ti biktima a nabigbig a ni Alexander Estimo Dizon, 46-anyos ken residente ti Bangar, La Union.
Kinunana a makasao ti biktima ngem saan daytoy a nakikoordinar iti pulisya para iti pannakakemmeg ti nakalibas a suspek.
Innayonna a pinilitda a mangipaay iti impormasyon ti biktima no am-ammona ti suspek wenno anya ti posible a rason ti panakapaltog daytoy ngem saan a nangipaay iti anyaman nga impormasyon ti biktima.
Maipalagip nga agtaktakder ti biktima iti nadakamat a lugar idi pinaltogan daytoy ti saan pay a nabigbig a suspek.
Nakita met daytoy ti maysa a concerned citizen ken intarayna ti biktima iti ospital.
