BAGUIO CITY – Maiyawid ita nga aldaw sadiay Tabuk City, Kalinga ti bangkay ni Corporal Nelson Wailan a pinapatay dagiti terorista sadiay Marawi City.
Sigun kenni Captain James Taguic manipud iti 503rd brigade ti Philippine Army, maibiahe ti bangkay ni Wailan babaen iti eroplano ken mailabas pay daytoy sadiay Tuguegarao City, Cagayan.
Kinuna ni Taguic nga idauluanna ti pannakasabat ti bangkay ni Wailan apaman a maisangpet daytoy sadiay Kalinga.
Mainaig iti daytoy ket kinuna dagiti team mate ni Wailan a simrek dagiti grupo daytoy iti maysa a pasdek sadiay Marawi City idi pinalpaltugan daytoy dagiti kabusor.
Maatap a dinukot dagiti terorista ni Wailan ken ti maysa pay a soldado ken kalpasanna ket nasarakan laengen dagiti otoridad ti nauram a bangkay dagitoy iti maysa a tunnel.
Ti Wailan ket maysa a Cordilleran Scout ranger ken tubo daytoy ti Bantay, Bulanao Tabuk City, Kalinga.
