BAGUIO CITY – Naiyawiden sadiay Kiwangen, Abatan, Bauko, Mountain Province ti bangkay ti Igorot Special Action Force trooper a pimmusay iti gubat sadiay Marawi City.
Segun Robelyn Tegwa, naibantay ti bangkay ti asawana a ni PO3 Daniel Tegwa iti balayda ditoy siudad ti Baguio sakbay nga inbiaheda idi parbangon sadiay Montañosa.
Kinunana a maitabon met ti asawana inton Oktubre 24, aldaw ti Martes.
Maipalagip a naidestino sadiay Marawi ni PO3 Tegwa sipud pay idi Mayo 23 ken ti grupo dagitoy ti balligi a nakapatay kada Abu Sayyaf leader Isnilon Hapilon ken militant leader Omar Maute idi lunes.
Naragsak nga impadamagna iti asawana ti balligi a resulta ti operasyon gaputa makaawiden daytoy iti pamilyana.
Kinuna ni Robelyn nga agsapa ti lunes idi nagtawag ti asawana a mangkumkumusta kadakuada iti anakda.
Nupay kasta, ala una idi malem kalman a naidanon kenkuana ti nakalkaldaang a damag, ken iti alas kwatro ti malem a nakumpirmar ti panakatay ti asawa daytoy.
Kinuna met dagiti dadduma a SAF troopers a pinaltogan ti sniper ni PO3 Tegwa kalpasan ti pananganna iti pangaldaw.
Dinakamat met ni SAF Director Benjamin Lusad a kadwa ni Tegwa dagiti scout rangers para iti maudi a test mission daytoy idi nakornerda dagiti dua a terorista.
Ni PO3 Tegwa ket kameng ti Class 200 ti Scout Ranger Regiment ken miembro ti SAF Maragtas 64, Team II.
