BAGUIO CITY – Nabigbigen ti bangkay ti lalaki a nasarakan sadiay Sitio Samuyao, Ampucao, Itogon, Benguet idi kanikadua.
Sigun kenni PCI Eugene Raymundo, daytoy ket binigbig dagiti kakadwa ken kabagian ti biktima a nakangeg iti damag nga adda ti bangkay a nasarakan iti nasao a lugar.
Nagbigbig daytoy ni Jordan Pacion, 22-anyos, baro, residente iti East Quirino Hill Extension, Baguio City ken mapukpukaw sipud pay iti rabii ti April 26.
Iti met panakiuman ti Bombo Radyo iti kabsat ti biktima a ni Benjie Pacion ket kinunana nga awan ti dakes nga aramid ken record ti kabsatna malaksid iti panakibarkadana kadagiti kabarangayanda isut gapuna nga awan ti rason wenno makitada a motibo iti nasao a krimen.
Kinuna met ti kakadwa ti biktima a sakbay a napukaw daytoy ket nagturongda iti deppaar ti Legarda Road tapnu ag-barbeque.
Nupay kasta, idi nagsina dagitoy ket killaat laengen a napukaw ti biktima ken segun kadagiti nakakita ket maysa a puraw a kotse ti simmardeng iti ngato ti nagtugawan ti biktima ken pinilitda daytoy nga inserrek iti nasao a lugan.
Immapela met dagitoy kadagiti uppat a testigo a makitinullongda para iti dagus a panakasolbar ti kaso.
Kabayatanna, impanamnama ni PCI John Cayat Jr., baro a dadaulo ti Baguio City Police Office Station 5 a mangipatungpalda iti nauneg nga imbestigasion iti nasao nga insidente.
Sigun iti opisial, kinniddaw kenkuana ni City Director PSSupt. Ramil Saculles a mangipatungpal dagitoy iti kanayunan nga imbestigasion iti kaudian a lugar a nakakitaanda iti biktima.
Kinunana a personal a nagkiddaw iti tulong ti ina ti biktima a ni Virginia Pacion iti opisina ti City Director para iti dagus a panakarisut ti nasao a kaso.
