![](https://img.bomboradyo.com/baguio/2021/11/wanted-NPA.jpg)
BAGUIO CITY – Nabigbigen ti maikadua a kameng ti Kilusang Larangang Guerilla Abra-Mountain Province-Ilocos Sur (KLG-AMPIS) ti New People’s Army (NPA) a pimmusay iti panakirinnupakda iti tropa ti gobyerno sadiay Gueday, Besao, Mountain Province idi Sabado, October 30.
Nabigbig daytoy a ni Jan Michael Ayuste alyas Simon nga agserserbi kas intel ti Platoon Mountain Province ti KLG-AMPIS ti NPA.
Immunan a nabigbig ti kadwana a pimmusay a ni Marcos Kinaud Yocogan alyas Timmy/Corel/Melu nga agserserbi kas Commanding Officer ti Platoon Mountain Province ti KLG-AMPIS ti NPA ken sumangsango iti kaso a murder, frustrated murder ken attempted murder.
Naamuan pay a karaman dagiti dua kadagiti listaan ti wanted nga NPA ken adda ti gunguna a nakapatong iti ulo dagitoy.
Maipalagip a manarimaan ti joint combat operations ti Bravo Company ti 69th Infantry Battalion, Philippine Army, kadwada dagiti pulis tapnu kumpirmaren ti report seknan iti presensia dagiti rebelde nga agkik-kikil ken agbirbiruk ti taraon iti nasao a lugar.
Naamuan a kinasao dagiti otoridad ti grupo ni Yocogan para iti panagsukoda ngem nagkedked dagitoy a nagresulta iti rinnupak a pimmaut iti sumagmamano a minutos.
Kalpasna ti rinnupak ket narekober ti bangkay da Yocogan ken Ayuste.
Nakumpiskar pay iti nakapasamakan ti engkwentro ti dua a rifle, maysa nga improvised explosive device (IED), dua a bandolier a naglaon ti siyam a magazine nga addaan met ti karga a bala, nagduduma a kagawaan ken subersibo a dokumento.
Sigun iti militar, dakkel ti epekto iti NPA ti panakapapatay ti maysa kadagiti lider dagitoy nangruna ta adda iti militar ti sibubukel a suporta ti komunidad a nauman iti kinaranggas dagiti rebelde.
Nupay kasta, agtaltalinaed ti apela ti tropa ti gobyerno iti panagsuko dagiti nabatbati a rebelde nangruna ta nakasagana met dagitoy a tumulong iti panagsubli dagitoy iti sidong ti gobyerno.