BAGUIO CITY – Nasarakanen a bangkay ti baro a nagaboran iti nargaay a daga sadiay Buhyo, Binablayan, Tinoc, Ifugao idi kalman.
Nabigbig daytoy a ni Janerl Pateyec Baguista, 19, ken residente ti sitio Mabalat, Gumhang, Tinoc, Ifugao.
Sigun iti Tinoc PNP, alas kwatro iti malem kalman idi nabirukan ti bangkay ti nasao a baro.
Maipalagip a paturong kuma sadiay Nueva Viscaya ti biktima tapnu agideliber iti nateng idi nakitana ti maysa nga elf truck nga addaan karga a nateng a nailutlut iti kalsada gapu iti pitak.
Dimsaag ti biktima iti lugan nga imanmanehona ken tinulonganna da Ulyos Martin ken ni Bilger Nehyeban a nangdalos iti pitak iti kalsada ngem gapu iti agtultuloy a panagtudo ket limmukay ken nargaay ti daga iti ngatoen dagitoy a nanggabor kadakuada.
Gapu iti daytoy, nagsagrap iti minor injuries da Martin ken Nehyeban.
Nangisayangkat met iti search and retrieval operations dagiti otoridad agingga a nasarakanda ti bangkay ti biktima.
