BAGUIO CITY – Pinadayawan ti Philippine Drug Enforcement Agency (PDEA) – Cordillera ti pimmusay nga operatiba ti ahensia iti maibagbaga a ‘misencounter’ iti nagbaetan dagiti operatiba ti PDEA ken PNP sadiay Quezon City a nakatayan ti tallo nga operatiba ken maysa a sibilyan.
Binigbig ni PDEA-Cordillera regional director Gil Castro ti pimmusay a ni Agent Rankin Gano manipud sadiay Lagawe, Ifugao a sigud a nakaduada iti PDEA-Cordillera.
Patienna nga agingga iti maudi a minuto iti biag ni Agent Gano ket impakita ti operatiba ti naisangsangayan a kababalin daytoy kas maysa a Cordilleran, partikular ti kinatured daytoy.
Dinakamatna met nga addan sadiay Manila ti asawa daydi Agent Gano tapnu isimpa dagiti dokumento para iti panakaiyawid ti bangkay ti operatiba iti pagtaenganda sadiay Ifugao ita nga aldaw wenno inton bigat.
Inkarina pay nga ipaay amin ti PDEA ti tulong a mabalinda a maited iti napanawan a pamilya tapnu matulongan dagitoy.
Kabayatanna, natalged metten ti kasasaad dagiti agents ti PDEA a nadangran iti nasao nga insidente, pakairamanan ti dua a Cordillerans.
