BAGUIO CITY – Nangipila iti mosyon ni DOTr – Cordillera Assistant Regional Director Mohammad Nasser Abbas para iti panakaisanod ti 90-day preventive suspension daytoy nga impaulog ni Transportation Secretary Arthur Tugade.
Iti panakipatang ti Bombo Radyo kenni ARD Abbas, kinunana a daytoy ket gaputa addan ti desisyon ti korte kadagiti alegasyon kenkuana.
Kinunana a daytoy ket gapu pay laeng iti maatap a panangtutokna iti paltog iti maysa a mapapati a fixer iti LTO ken ti maatap a panagkiddawna iti pasuksok para iti panakai-release dagiti na-impound a lugan.
Dinakamatna nga iti agdama ket maisagsaganan ti mosyon nga ipila ti kampona nangruna ta addan metlaeng ti sungbat nga impaayna kenni Transportation Secretary Tugade.
Innayona met nga awan ti parikut iti panakasuspindirna gaputa dua laeng ti akusasyon kenkuana ken babassit laeng dagitoy.
Maipalagip nga idi kalman ket naipaulog ti desisyon para iti panakasuspindir da Abbas ken DOTr – Cordillera Regional Director Atty. Jose Eduardo Natividad.
