BAGUIO CITY – Nakasagana nga agtulnog ni Department of Transportation (DOTr) – Cordillera Regional Director Atty. Jose Eduardo Natividad iti naipaulog a 90-day preventive suspension daytoy manipod iti DOTr-Central Office.
Sigun kenkuana, dagus daytoy a nangipaay iti sungbat iti nasao a pammilin tapnu agpalawag iti sangsangwenna a kontrobersia.
Kinunana a naragsak daytoy gaputa dua da kenni Assistant Regional Director Mohamad Nasser Abbas a naipaayan iti preventive suspension.
Kinunana a babaen iti daytoy ket agbalin a patas ti panakaadal ti kaso dagitoy iti ahensia.
Nupay kasta, impettengna nga awan ti basaran ti alegasion a maibatbato kontra kenkuana nangruna iti maatap a panagkiddaw daytoy iti pasuksok kadagiti agap-aplikar iti Certificates of Public Convenience (CPC) kadagiti franchise.
Kabayatanna, awan pay laeng ti nadutukan nga Officer in Charge (OIC) a mangidaulo iti DOTr-Cordillera kabayatan a matingtingiting ti kaso dagiti dua a nangato nga opisial ti ahensia.
