BAGUIO CITY – Sapsapulen ita ti Tuba Municipal Police Station ti driver ti SUV a nangdungpar iti innem a tattao a nakatayan ti dua kadagitoy sadiay Kennon Road, partikular iti Camp 4, Tuba, Benguet idi kanikadua.
Immunan a nabigbig ti nasao a driver a ni Bernard Soriano a residente ti Manila.
Sigun kenni PCI James Acod, hepe ti Tuba PNP, nangipaayen iti sworn statement dagiti kabagian dagiti biktima ken irekomendarda met ti panakaipila ti kaso a double homicide, multiple physical injuries ken damage to properties kontra iti suspek.
Maipalagip a bayat nga agur-uray dagiti biktima iti lugan a paturong kuma iti siudad ti Baguio idi dinalapos dagitoy ti SUV a bimmaliktad kalpasan ti insidente.
Naitaray dagiti biktima iti pagagasan, pakairamanan ti driver ti SUV ngem iti panagturong dagiti pulis iti pagagasan para iti kanayonan nga imbestigasyon ket saanda a nadanunan ti suspek.
Iti met panakiyuman ti Bombo Radyo kenni Nathaniel Viloria, ama ti maysa kadagiti biktima, kiniddawda ti napartak a panakasapol ti suspek kalpasan a nadamagda ti panaglibas ti suspek manipud iti pagagasan.
Maipalagip a dagus a pimmusay iti insidente ti dua a senior citizens bayat a nadangran ti uppat nga apo dagitoy.
