--Ads--

BAGUIO CITY – Kitkitaen ita ti pulisya ti dua a suspek iti panakapalpaltog ti maysa a human rights advocate ken journalist sadiay Ifugao idi Martes, August 6.

Sigun kenni PCol. Madeline Bazar, deputy director for operations ti Police Regional Office-Cordillera, agtultuloy ti panagurnong ti provincial special investigation task group iti impormasyon a mangitunda iti panakabigbig ken panakakemmeg dagiti suspek iti panakapalpaltog ni Brandon Lee.

Kinunana a nakaawat dagiti pulis iti impormasyon iti maatap a presensia ti dua nga indibidual iti masakupan ti nakapasamakan ti insidente sakbay ti pammaltog.

Innayonna nga agkitkitada kadagiti video footages kadagiti CCTV cameras iti nasao a disso a makatulong iti imbestigasyon malaksid nga addan dagiti nakapatangda a sumagmamano a testigo.

Ur-urayenda metlaeng ti resulta ti crime lab iti kalibre ti paltog a naaramat iti krimen.

Sigun pay kenni PCol. Bazar, namin dua a natamaan ti biktima kas maibasar iti initial findings dagiti doktor.

Impasiguradona met ti panakadusa ti asinoman a mapaneknekan a nangaramid iti nasao a pammaltog nupay awan ti naituding nga aldaw wenno bulan para iti panakarisut ti kaso.

Maipalagip nga agtatrabaho ti American-Chinese national a ni Lee kas paralegal volunteer ti Ifugao Peasant Movement ken mannurat iti maysa nga online news website iti Amianan Luzon.