BAGUIO CITY – Nangipatulod ti Police Regional Office – Cordillera (PROCOR) iti imbestigador manipud iti Regional Investigation Unit (RIU) tapno tumulong iti imbestigasyon ti Kalinga Provincial Police Office (PPO) iti napasamak nga engkwentro dagiti kameng ti Kalinga Provincial Public Safety Company (PPSC) kontra iti maysa a high value target sadiay Lubuagan, Kalinga idi kalman.
Kinuna met ni PSSupt. Brent Madjaco, provincial director ti Kalinga PPO a manamnama a maiturong iti Scene of the Crime Operative (SOCO) dagiti 36 a pidaso ti narekober a 5.56 mm cartridge ti M-16 rifle iti crime scene para iti ballistics examination.
Maipalagip nga iserbi kuma dagiti kameng ti Kalinga PPSC ti warrant of arrest ni Willy Sagasag a maysa a top most wanted personality iti national level ngem limmaban ti grupo ti suspek a nangitunda iti pannakatay ti uppat a pulis ken nakaro a nakadangran ti tallo a dadduma pay.
Nabigbig dagiti pimmusay a da PO3 Cruzaldo Lawagan, PO2 Jovenal Aguinaldo, PO1 Charles Compas kenni PO1 Vincent Paul Tay-od bayat a nadangran da PSI Edward Liclic, PO1 Ferdinand Assuncion ken PO1 Ferdie Liwag.
Pimmusay metlaeng ti suspek iti nasao nga engkwentro.
