BAGUIO CITY – Naipilan ti kaso kontra iti grupo dagiti turista manipud Cebu a responsable iti panaka-uram ti ti paset ti Mt. Pulag sadiay Kabayan, Benguet idi Sabado.
Sigun kenni Deputy Benguet Provincial Prosecutor Andres Gondaya, impila ti Philippine National Police (PNP) ken Bureau of Fire Protection (BFP) ti kaso nga reckless imprudence resulting in arson kontra kadagiti pito nga indibidual.
Nangisumitir met iti affidavit ni Mt. Pulag Parks Area Superintendent Teber Dionisio a mangpampaneknek a ti nasao a grupo dagiti turista manipud Cebu ti responsable iti panaka-uram ti bantay gapu iti inaramat dagitoy a butane stove.
Gapu iti daytoy, sumangsango metlaeng dagiti nasao a turista iti kaso a panaglabsing iti Section 78 ti PD 705 wenno ti Forestry Code of the Philippines.
Maipalagip a dumanon iti 5.7 kilometers a grass lands ti nauram iti nalatak a Mt. Pulag a nangitunda met iti panakasuspindir ti hiking ken trekking activities iti sumagmamano a paset daytoy.
