BAGUIO CITY – Temporaryo a nawayawayaan ti gwardiya a nangpaltog iti maysa a maatap nga agtatakaw iti maysa a hotel sadiay Salud Mitra, Baguio City ita laeng nabiit.
Nagdesisyon ti prosecutor’s office a mawayawayaan ti gyardiya a ni Danilo Zambag Jr. gaputa saan nga umdas dagiti naiparang nga ibidensia kontra kenkuana.
Kabayatanna, agingga ita ket saan pay laeng a nabigbig ti bangkay ti maatap nga agtatakaw ken temporaryo nga agtaltalinaed ti bangkay iti Bahay Damayan sadiay Marcos Highway.
Mapattapatta nga agtawen daytoy iti tallo pulo ken agtayag iti 5′ 2, nakasuot iti nangisit a kallugong, berde a t-shirt, puraw a sandal, addaan dua a silver ring, naka-aritos ken addaan iti tattoo a “MEJIA” iti kanawan a takyag ken tattoo a “BNG” iti kanawan nga abagana.
Maipalagip a napaneknekan iti kanayunan nga imbestigasyon dagiti pulis a natakawan dagiti nakacheck-in a guest iti nasao a hotel ken narekober iti suspek dagiti agkakangina a kagawaan kas iti relo, sumagmano a cellphone, laptop ken cash a dumanon iti nasurok P800,000.
Agparparang iti imbestigasyon nga agliblibas ti biktima ken ti kaduana babaen iti panagkalay-atda iti kongkreto a pader ti nasao a hotel ngem nakita ti gwardiya agingga pinaltuganna ti maysa kadagitoy iti namindua a daras.
Natnag iti daga ti biktima manipud iti pader nga addaan kangato nga 11 a kadapan ken nagsagrap daytoy iti maysa a tama ti bala ti paltog iti kanawan nga abaga bayat a maysa met iti kanawan a saka.
