[UPDATE] BAGUIO CITY – Kinniddaw manen ni Mayor Maurico Domogan ti nairteng a koordinasion ti Baguio City Police Office ken ti Bureau of Fire Protection – Baguio para iti panakabigbig ti suspek a nang-uram iti art installation sadiay Upper Session Road, siudad ti Baguio.
Sigun iti mayor, kasapulan a makemmeg ti nagdadael iti dekorasyon tapnu maamuan ti rason no apay a naaramidna ti nasao a krimen.
Impettengna nga ar-aramiden amin ti lokal a gobyerno ti siudad tapnu maipaayanda iti napintas a dekorasyon ti Baguio para iti Paskua ngem saanda a maawatan no apay nga adda dagiti saan a mangkayat ken maragsakan kadagitoy.
Innayonna a saan nga agpapada iti panagkita dagiti tattao iti kinapintas ti maysa a banag ngem saan a nasken a dadaelenda dagitoy.
Sigun pay kenni mayor Domogan, nasken nga agbalin daytoy karit kadagiti maseknan nga opisina para iti panangpapintasda iti tunggal dekorasyon a tinawen a maiparparang iti siudad.
