BAGUIO CITY – Nakadanunen sadiay Pangasinan ken La Union ti imbestigasion ti Tuba Municipal Police Station tapno laeng mabigbig ti bangkay ti babai a nasarakan iti rangtay ti nagbeddengan iti Camp 2 ken Camp 3 sadiay Tuba, Benguet itay laeng nabiit.
Iti interview ti Bombo Radyo Baguio kenni PMaj. Dominador De Guzman Jr., hepe ti pulisya sadiay Tuba, kinunana nga ikagkagumaanda ti mangsukimat iti kinasiasino ti nasao a babai.
Inaklonna a marigatanda a mangbigbig iti bangkay gaputa awan ti aniaman a narekober manipud iti daytoy a mabalin a paka-alaan ti impormasyon.
Maipalagip a nakasuot ti babai iti navy blue sweatshirt, gray leggings, mapapati nga agtawen iti 45-50, napudaw, brown ken atiddog ti buokna ken 5’4 ti katayagna.
Immunan a kinuna ti pulisya nga awan ti aniaman a dunor iti bangkay.
Agtaltalinaed ita ti bangkay ti babai iti Bahay Damayan funeral homes ken naituding a maipasidong iti otopsiya.
Agpanpanawagan met ti Tuba Municipal Police Station kadagiti mapukpukawan iti kapamilya wenno kabagyan nga agturong laeng iti istasyonda para iti posible a panakabigbig ti bangkay.
