BAGUIO CITY – Naibayog iti Tropical Cyclone Wind Signal No. 1 ti sumagmamano a paset ti Luzon gapu iti epekto ti Tropical Depression Ferdie.
Maibasar iti severe weather bulletin no. 2 ti PAGASA, saksakupen ti signal no. 1 ti 10 a lugar iti laud a paset ti Ilocos Norte ken iti walo a lugar iti laud a paset ti Ilocos Norte.
Iti alas-kwatro idi parbangon, naudi a nasaripatpatan ti sentro ti Tropical Depression Ferdie iti 210 a kilometro iti laud amianan-laud ti Sinait, Ilocos Sur wenno iti 210 a kilometro iti laud ti Laoag City, Ilocos Norte.
Imet daytoy ti angin nga addaan kapigsa a 55 kph, panagbanesbes a 70 kph ken agturturong iti direksion ti amianan iti kapartak a 20 kph.
Sigun iti PAGASA, rumwar ti Tropical Depression Ferdie iti Philippine Area of Responsibility inton rabii iti kanito a madanunna ti 390 a kilometro iti laud amianan-laud ti Basco, Batanes.
Bambantayan metlaeng ti PAGASA ti Tropical Storm Jangmi a naudi a nasaripatparan iti 1,135 a kilometro iti amianan amianan-daya ti extreme Northern Luzon.
Nasaripatpatan met ti maysa a tropical depression iti ruar ti masakupan ti Pilipinas iti kaadayo a 2,580 kilometro manipud iti daya amianan-daya ti extreme Northern Luzon.
Kabayatanna, ap-apektaran metlaeng ti southwest monsoon wenno hanging habagat ti Luzon.
Kadagiti partikular a sasaaden ti panawen, mapasaran sadiay Ilocos Region, iti rehion Cordillera, iti Zambales, Bataan, Tarlac ken Pampanga ti monsoon rains gapu iti hanging habagat ken iti Tropical Depression Ferdie.
Mapasaran met iti Metro Manila ken nabatbati a paset ti Luzon ti sagpaminsan a panagtudo gapu iti hanging habagat.
Mapasaran sadiay Visayas ken Mindanao ti naingpis agingga iti napuskol nga ulep iti tangatang nga addaan ti pattopattok a panagtudo gapu iti localized thunderstorms.
Maibalballaag ti posibilidad iti panagreggaay wenno panaglayos gapu iti napigsa a bayakabak ti tudo bayat a marikna iti pagilian ti kalkalaingan agingga iti napigsa a pul-oy ti angin.
Iti temperatura, agay-ayam ti temperatura ditoy Baguio City iti 16-20°C.
Lumnek ti init iti 6:25 ti rabii.
