BAGUIO CITY – Nagkiddaw iti pammakawan ti driber ti Calcalan-Pinsao route a nangibabain iti maysa a pasaherona kalpasan a nalipatan daytoy nga agbayad iti plete.
Iti panakipatang ti Bombo Radyo iti nasao a driber, inlawlawagna a saanna a panggep nga ibabain ti nasao a babai gaputa panggepna laeng nga alaen ti plete daytoy.
Kinunana nga idi naglugan ti nasao a babai ket nakitana a saan daytoy a nagiyaw-awat iti pletena isut gapuna nga idi nakadanun dagitoy iti depaar ti Abanao Square ket binagaanna ti babai a saan pay daytoy a nagbayad.
Inlawlawagna pay a saan daytoy a nagpukkaw gaputa normal a nangato ti boses daytoy ken saanna met a maiyarasaas ti kayat daytoy nga ibaga gaputa adda iti likod ti jeep ti babai.
Dinakamatna nga immasideg kenkuana ti nasao a babai tapnu bayadanna iti doble ti plete daytoy ngem impettengna a nasken a ti umno laeng a plete ti alaenna.
Inaklon metlaeng ti babai kenkuana a managlipat daytoy isut gapuna a kinuna a napimpintas a no aglugan daytoy iti parapasahero a jeep ket agbayad daytoy a dagus sakbayna a malipatan ti plete daytoy.
