BAGUIO CITY – Agtultuloy paylaeng ti hot pursuit operation ti tropa ti gobyerno kontra kadagiti nakarangetda a kameng ti rebelde a New People’s Army (NPA) sadiay Pilar, Abra idi kalman.
Sigun kenni Bombo Radyo kay Lt.Col. Arcadio Posada, commanding officer ti 69th Infantry Battalion, Philippine Army, kabayatan ti panagsawar dagiti soldado ket nasarakanda ti kampo dagiti rebelde.
Kinunana a sadiay a narekober pay dagiti soldado ti maysa nga M16 upper receiver, 15 a basyo ti bala, maysa a basyo ti bala ti M203, walo a bala ti M16, magazine spring ken innem a litro ti danum.
Dinakamatna a namindua a nakarinnupak dagiti soldado ti nagduma a grupo dagiti rebelde nga NPA.
Immuna a nakarinnupak ti tropa ti 69th Infantry Battalion, Philippine Army ti agarup nasurok lima a rebelde kabayatan ti panagpatrolya dagiti soldado sadiay bisinidad ti Ocup, Pilar, Abra.
Kalpasanna ket nakarinnupak met ti tropa ti 73rd Division Reconnaissance Company, Philippine Army ti agarup nasurok 30 nga armado a rebelde sadiay Nagcanasan, Pilar, Abra.
Agpada a pimmaut ti dua nga engkwentro iti agarup 20 a minutos.
