BAGUIO CITY – Manamnama wenno posible a maipilan ti kaso a murder ken kidnapping kontra kadagiti suspek a nangkawtibo ken nangpapatay iti daydi Harjan Paycao Lagman a residente ti Irisan, Baguio City idi napalabas a Nobyembre.
Imbinglay daytoy ni Baguio City Police Office (BCPO) director PCol. Allen Rae Co iti eksklusibo nga interview ti Bombo Radyo Baguio kagiddan ti panangkumpirmarna a kameng ti Regional Drug Enforcement Unit ti Police Regional Office Cordillera (PROCOR) dagiti nangkawtibo iti daydi Lagman.
Kinunana a rumrumwar iti inisyal nga imbistigasyonda a dua manipod kadagiti nangkawtibo iti daydi Lagman ket pulis bayat a dagiti dadduma ket sibilyan.
Nupay kasta, nagkedked daytoy a mangiwaragawag iti pakabigbigan dagiti suspek nga ita ket addan iti kostudiya ti regional headquarters ti PROCOR.
Dinakamatna a pagliblibakan met dagiti suspek ti nasao a krimen isut gapuna nga awan ti maalada nga impormasyon kadagitoy.
Iti baet daytoy, inyunay-unayna a ti panakaikustodiya dagiti suspek a pulis ket pammaneknek a saanda a panpanuynuyan ken baybay-an dagiti dakes wenno maikaniwas iti linteg nga aramid dagiti kadwada a pulis.
Impettengna pay a saanda a konsintiren ti inaramid dagiti suspek kagiddan ti panangipanamnamana nga aramidenda amin tapnu maipaay ti hustisya iti panakapapatay ni Lagman.
Innayon ni Col. Co a maibilbilang daytoy nga isolated case ken personal nga isyu ti makitkitada pay a motibo.
Kabayatanna, mangnamnama ti pamilya daydi Lagman a maragpatdan ti naan-anay a hustisya kasaruno ti panakabigbig dagiti suspek iti krimen.
Iti interview ti Bombo Radyo Baguio kenni Linda Lagman, ina ti biktima, impeksana ti panagyamanna kenni Baguio City Mayor Banjamin Magalong ken iti dadaulo ti pulisya gapu iti panakabigbig dagiti suspek.
Kinunana a pursigido ti pamilyada a mangituloy iti kaso kontra kadagiti suspek tapnu maragpat ti hustisya.
Mangnamnamada pay a maisubli wenno mabirukan ti napungsay nga ulo ti anakda, pakairamanan ti dadduma a bado, cellphone ken kwarta daytoy.
Innayonna a saan daytoy a makontento agingga a saanna a makita ti panakaipataw ti linteg kadagiti tao a nangaramid iti krimen iti daydi anakda.
