BAGUIO CITY – Inaprobaranen ti Board of Regents ti Benguet State University (BSU) ti kiddaw dagiti vendors iti Swamp area sadiay Betag, La Trinidad, Benguet a maipaayan ti diskwento ti baybayadanda nga abang.
Iti panakiuman ti Bombo Radyo Baguio, kinuna ni BSU President Dr. Felipe Comila a nagbobotos dagiti Board of Regents ken kaaduan kadagitoy ti nangpabor a saanen a bayadan dagiti vendors ti tallo bulan nga abangda manipud Marso agingga Hunyo 15 ti agdama a tawen.
Inlawlawagna a nabayagan ti panakadesisyon ti nasao a kiddaw dagiti vendors gaputa awan ti bilegna a mangdesisyon iti daytoy ken kasapulan a maiuman iti Board of Regents.
Maipalagip a kiniddaw dagiti vendors iti Swamp area a maksayan ti P500 nga abangda tunggal lamisaan gaputa bassit ti kustomer dagitoy.
