BAGUIO CITY – Agtultuloy ti nainget nga imbestigasyon ti pulisya ti maatap a panakahold-up ti tallo a lallaki sadiay Julongan, Kiangan, Ifugao a naka-alaan ti P2.7-M a gatad ti kwarta a para kuma kadagiti benipisaryo ti Pantawid Pamilyang Pilipino Program ti Tinoc, Ifugao idi kanikadua.
Sigun kenni SPO1 Berito Dulnuan Jr., imbestigador ti nasao a kaso, manarimaan ti panangsapolda kadagiti posible a witness iti insidente nangruna ta adayo iti kabalbalayan ti nakapasamakan ti maatap a panaghold-up.
Kinunana a naka-apektar met laeng iti imbestigasyonda ti naladaw a panakaireport ti pasamak gaputa sigun iti salaysalay dagiti tallo a biktima, napasamak ti insidente iti 8:30 ti rabii idi kanikadua ngem nag-report da laeng iti 2:10 ti parbangon idi kalman.
Innayonna a saanda pay laeng a masinunuo no adda iti pakainaigan dagiti rebelde iti nasao a kaso.
Maipalagip nga iti inisyal nga imbestigasyon, nawithdraw ti nasao a gatad manipud iti maysa a kooperatiba sadiay Lagawe ken naikabil iti maysa a backpack nga ingeman ti maysa dagiti tallo nga indibidual a mangitulod kuma iti daytoy paturong sadiay Tinoc, Ifugao.
Nagluganda iti dua a motorsiklo ken idi makadtengda iti kurba a kalsada sadiay Sitio Awa, Julongan, Kiangan ket sadiay a pinasardeng dagitoy dagiti tallo a suspek nga armado kadagiti paltog ken indeklarada ti hold-up.
Inala dagiti suspek a nakasuot iti nangisit a mask ken dark colored a pantalon ken shirts ti bagpack sakbay dagitoy a naglibas.
