BAGUIO CITY- Pimmusayen ti kaipaspasngay a maladaga a nasarakan a naibelleng iti maysa a kanal sadiay Purok 3, Irisan, Baguio City idi malem kalman.
Sigun iti pulisya, pimmusay ti maladaga a lalaki bayat ti panakatamingna iti pagagasan idi rabii gapu iti dunor a nalak-am daytoy.
Maipalagip a kinuna ni PCI Pablo Emmanuel Nead, dadaulo ti Station 9 ti Baguio City PNP a naakawatda iti tawag mainaig iti panakaibelleng ti maysa a maladaga a nabalkot ti lupot iti maysa a kanal iti nasao a lugar.
Kinunana a naimatangan a mismo dagiti testigo ti panangibaot ti maysa a babae iti nasao a malagada iti kongkreto a pader sakbay ti panangibellengna iti daytoy iti kanal.
Impagarop met dagiti pulis a pimmusayen ti maladaga idi nakadanunda iti nasao a lugar ngem idi alaendan daytoy ket nagsangit ti maladaga isut gapuna a dagus nga intarayda iti pagagasan.
Iti kanayunan nga imbestigasion ti pulisya, naduktalan a ti nasao a babae ket mismo nga ina ti maladaga.
Naamuan a ti ina ket agtawen iti duapulo ket maysa, maysa a person with disability partikular wenno awanan iti ramay iti dua nga ima daytoy.
Sigun iti pulisya, adda ita ti nasao nga ina iti pagagasan para iti panakataming daytoy bayat nga adda ti maladaga iti morge ti pagagasan.
Maur-uray met ti sumaruno nga addang dagiti kabagian ti nasao nga ina nangruna ta saanda nga amo a nagsikog ken nagpasngay ti nasao a babae.
