BAGUIO CITY – Makumikom latta ni Baguio City Mayor Benjamin Magalong a mangar-aramid kadagiti trabahona iti baet ti panakaipasidongna iti home quarantine kalpasan a nagpositibo iti COVID-19 ken iti panagpa-imbagna manipud iti nasao a sakit.
Iti eksklusibo nga interview ti Bombo Radyo Baguio, imbinglayna nga idi pay rabii ti Martes, March 30 a nangrugi a nariknana dagiti saan unay a nakaro a sintomas ti COVID-19 kas iti panag-uyek, panakapukaw ti ganaygayna a mangan ken ti panagsakit ti karabukob, ulo ken nagduduma a paset ti bagina.
Kinunana nga ita ket naka-home isolation daytoy.
Nupay adda latta dagiti marikriknana a sintomas ti COVID-19, dinakamat ni Mayor Magalong nga agtultuloy ti panangwanawan dagiti doktor iti salun-atna ken ti panagtumarna kadagiti agas malaksid pay nga adda ti nakasagana nga oxygen tanks para iti emerhensia.
Pagyamyamananna metlaeng nga awan kadagiti dadduma a nakapulapolna ti nagpositibo nupay dua kadagiti close-in security daytoy ti nakaptan iti coronavirus.
Innayon ti Contat Tracing Czar a kagiddan ti panag-quarantine-na ket naggigiddan dagiti dinar-arayanna a virtual meetings iti IATF, National Task Force Against COVID-19 ken iti Kongreso malaksid pay kadagiti idadauluanna a panagsanay iti contact tracing dagiti dadduma a lokal a gobyerno ken dagiti trabahona iti lokal a gobyerno ti Baguio.
Pagyamyamanan pay ni Mayor Magalong dagiti amin a nangipatulod ti mensahe ken kararag para iti napartak a panagimbagda manipud iti COVID-19.
