BAGUIO CITY – Saan pay laeng a nakaruar iti pagagasan ti maysa kadagiti innem a nadangran iti panakatnag ti naglugananda a pick-up sadiay Beto, Dalipey, Bakun, Benguet idi kanikadua.
Nabigbig daytoy a ni Nelly Suni-En, 42, ken residente Dalipey, Bakun, Benguet.
Kabayatanna, nakaruaren iti pagagasan ti lima pay a nadangran a da Godfredo Antonio, 27, driver ti lugan; Rosemarie Antonio, 29; Kassandra Keate Antonio, 4; Grant Zion Antonio, 2; ken ni Precious Joy Budas Kelyawen, 16, a bin-ig a residente ti Taneg, Mankayan, Benguet.
Maibasar iti imbestigasyon ti pulisya, daldalyasaten ti lugan ti nasao a kalsada idi nagdayusdos daytoy agingga a natinnag iti rangkis nga addaan kauneg a nasurok kumurang 70 a metro.
Naitaray dagiti biktima iti Bekes Emergency Hospital bayat a ni Suni-en ket naiyakar iti ospital ditoy siudad ti Baguio.
