BAGUIO CITY – Naaddaan manen iti engkwentro iti nagbaetan ti tropa ti 50th Infantry Battalion ti Joint Task Force “TALA” ken dagiti rebelde a New People’s Army (NPA) kadagiti kabambantayan ti Apayao idi kanikadua.
Sigun kenni Lt. Col. Isagani Nato, public information officer ti AFP- Northern Luzon Command, manarimaan ti pursuit operation ken panangbiruk dagiti soldado kadagiti nakarangetda nga NPA idi kanikadua sadiay Barangay Bolo, Kabugao idi naranaanda dagiti tallo nga NPA.
Nagresulta daytoy iti 25 a minutos a rinnupak bayat a naipatulod ti augmentation force tapnu adda ti mangsabat kadagiti agsansanud a rebelde.
Nupay kasta, naranaan met ti augmentation force ti agarup 30 nga NPA a paset ti kangruaan a grupo dagiti komunista a rebelde nga agbalballasiw iti Kabugao National Road a nagresulta iti 40 a minuto a rinnupak.
Nagsanod dagiti rebelde paturong iti sigud a nakapasamakan ti engkwentro bayat nga agingga ita ket manarimaan ti pursuit operation dagiti soldado.
Mapapati met nga adda ti casualty kadagiti rebelde a grupo bayat nga awan ti nadangran iti tropa ti gobyerno.
Narekober pay dagiti soldado ti maysa a magazine ti AK47, nagduduma a basyo ti bala, maysa a magazine ti M16, maysa a paris ti rain boots, personal belongings ken dadduma a subversive documents.
Inkari met ti NOLCOM a maituloy ti focus military operations kadagiti lugar a pakasarakan kadagiti rebelde ngem silulukatda kadagiti rebelde a kayatna ti sumuko iti gobyerno.
