BAGUIO CITY – Nakikoordinaren ti Tuba Municipal Police Station iti Baguio City Police Station mainaig iti panakapapatay ti maysa a taxi driver sadiay Badiwan, Poblacion, Tuba, Benguet idi Sabado.
Nagturong ni PCI Andres Calaoa, dadaulo ti Tuba PNP iti opisina ni PSSupt. Ramil Saculles, dadaulo ti BCPO para iti panagkinomparada iti impormasyon a naala dagitoy iti insidente ti panakapapatay metlaeng ti maysa pay a taxi driver sadiay Km. 4, Asin Road, Baguio City idi Biyernes.
Kinuna ni Calaoa a paset daytoy ti panangduktalda iti motibo dagiti saan pay a nabigbig a suspek a nangpapatay kadagiti biktima nangruna iti taxi driver a napapatay sadiay Tuba gaputa saan a nagargaraw ti cellphone ken koleksion ti biktima a dumanon ti P3,000.
Gapu iti daytoy, inaklonna nga iti agdama ket saanda pay a maibaga no ti krimen ket maysa a kaso ti hold-up.
Immunan a nabigbig ti biktima a ni biktima a ni Roberto Albino, 47-anyos, tubo ti Bautista, Pangasinan, residente ti Km. 4, Asin Road, Baguio City.
Maibasar met iti resulta ti otopsiya nga impatungpal ti PNP-Scene of the Crime Operatives, nagsagrap ti biktima iti hemorrhagic shock gapu iti bagsol iti tengnged daytoy ken awan ti nakitada a defense wounds daytoy.
Naamuan met iti Tuba PNP a dumanon iti 11 inches ti kauneg ti bagsol a nasagrap ti biktima.
Ur-urayenda pay ti resulta ti DNA test kadagiti dara iti crime scene ken dadduma nga ebidensia malaksid nga adda pay ti naala a backpack iti uneg ti taxi.
Nainget met ken agtultuloy ti ipatpatungpal dagiti pulis a checkpoint iti masakupanda a munisipyo ken ti boarder checkpoint kaduada ti BCPO Station 10.
