BAGUIO CITY – Maiyawid sadiay Mt. Province ti bangkay ti maysa nga ama a pinaltogan ti saan pay a nabigbig a suspek iti Sunnyside Building sadiay Tabora Park, Lower Magsaysay Avenue, Baguio City kanikadua.
Immunan a nabigbig daytoy a ni Felicito Todlem, 59-anyos ken tubo ti Tadian, Mt. Province.
Iti panakiuman ti Bombo Radyo News Team kenni PCI Gil Imado, commander ti Baguio City Police Office – Station 2, kinunana a nagdesisyon dagiti annak ti biktima a maiyawid ti amada sadiay Lubon, Tadian, Mt. Province kalpasan a naipasidong iti otopsiya idi kalman.
Maibasar iti report ti pulisya, nagturong ti biktima iti maysa a bar iti nasao a lugar ken kabayatan ti panaginomna iti arak ket inasitgan daytoy dagiti dua a suspek ken kalpasan ti duapulo a minutos ket pimmanaw dagiti suspek, ken rimuar met ti biktima ngem sadiay a napaltogan ti ulona a nangitunda iti ipupusay daytoy.
Innayon ti pulisya a posible met nga am-ammo ti biktima dagiti suspek gaputa nagin-inistorya pay dagitoy iti uneg ti establishimiento.
Agtultuloy met ti panagsapol dagiti pulis kadagiti dadduma pay a testigo malaksid iti dua a testigo nga immunan a nagparang iti kuerpo ti pulisya.
