BAGUIO CITY – Posible a maiyawid ditoy siudad ti Baguio ita nga aldaw ti bangkay ni Dr. Brigida Amistad Claro a pimmusay iti aksidente sadiay Tagum City, Davao del Norte idi kalman a nakairamanan dagiti 15 nga empleyado ti Baguio General Hospital and Medical Center (BGHMC).
Iti panakiuman ti Bombo Radyo kenni Mayor Mauricio Domogan, kinunana nga immanamong ti militar a maaramat ti C-130 heavy-lift transport aircraft para iti panakaiyawid ti bangkay ti nasao a doktor ditoy siudad manipud iti Tagum Cosmopolitan Memorial Chapel sadiay Tagum City.
Dinakamatna a babaen daytoy iti efforts dagiti opisyal ti militar a kas kada Col. Arevalo, Col. Velasquez, ti opisina ni Sen. Loren Legarda ken dadduma pay a timmulong tapnu maipalubos ti panaka-aramat ti nasao nga eroplano.
Kagiddan iti daytoy, impeksa ti mayor ti panakipagrikna ti lokal a gobyerno ti Baguio iti pamilya daydi Dr. Claro a residente ti Nangalisan, Tuba, Benguet.
Kiniddawna pay ti panangikararag kadagiti nadangran iti dagus a panag-imbag dagitoy kagiddan ti panangipasiguradona a nakasagana ti siudad a mangipaay iti aniaman a tulong a kasapulan dagiti nadangran a biktima ken iti panaka-asikaso ti bangkay ti pimmusay a doktor.
Maibasar met iti report a naawatna, kangrunaan a nagsagrap iti nakaro a dunor kas iti fracture, multiple abrasion ken contusion ket ni Nurse II Michelle Suyat, 42 bayat a nagsagrap iti nagduduma a dunor da Dr. Virginia Mangati, 49; Dr. Eulina Lagdao, 50; dagiti nurses a da Marilyn Lapaz, 45; Nurse II Candida Donggayao, 53; Carmen Bumatnong, 49; Teresa Abrenica, 44; Allan Factora, 42; Lorraine Ramos, 31 ken Leah Serna, 31.
Karaman pay kadagiti nadangran ni Clarence Clemente, 52 nga Administrative Assistant ken ni Marites Baloran, 49, ti Computer Maintenance Technologist III (Head – MIS Section) ti BGHMC.
Saan met a naan-ano dagiti nurses a da Valorie Presco, 40 ken ni Jade Malicdan, 30.
