BAGUIO CITY – Rinugianen ti garbage hauler ti siudad ti Baguio ti panang-akopda kadagiti nabatbati a basura iti transfer area wenno staging area daytoy sadiay Lamtang, Puguis, La Trinidad, Benguet.
Sigun kenni La Trinidad Municipal Environment and Natural Resources Officer Arthur Pedro, manipud nagbantay dagiti residente ken dagiti pulis iti pastrek iti staging area ket naisardeng ti panangiturong ti hauker kadagiti basura manipud siudad ti Baguio iti nasao a disso.
Kinunana a nangipatulodda metten iti forest guards nga agserbi a kabinnadang dagiti pulis ken residente iti panakabantay ti nasao nga staging area.
Innayonna nga agbantay dagitoy agingga a maakop amin a nabatbati a basura ken agingga a madalusan ti nasao a lugar.
Nagyaman met dagiti residente sadiay iti panagtulnog ti hauler iti saanen daytoy a panagaramat iti nasao a transfer area.
Maipalagip a nabayag nga inreklamo dagiti maseknan a residente ti nabangsit nga angin nga agtataud iti nasao nga staging area nga amkenda a mangitunda iti parikut iti salun-at dagiti adda iti asideg ti pasilidad.
Kabayatanna, maangay inton Enero 25 ti compliance hearing ti nasao a garbage hauler kadagiti pagalagadan iti kontrata daytoy iti panagaramatna iti nasao a disso kas staging area kalpasan ti inspeksion nga impatungpal ti Environmental Management Bureau.
