BAGUIO CITY – Naibilin ti panakaisardeng ti operasyon ti gold processing plant dagiti small scale miners sadiay Barangay Gumatdang, Itogon, Benguet a nangitunda iti panakarugit ken panagbaliw ti maris ti danum iti Ambalanga River a masarakan sadiay.
Iti panakiuman ti Bombo Radyo kenni Environmental Management Bureau – Cordillera regional director Reynaldo Digamo, kinunana a nangipaulog iti cease and desist order ni MGB – Cordillera Regional Director Fay Apil apaman a naawatda ti resulta ti inisyal nga imbestigasyon ti impatuloda a joint monitoring team iti nasao a karayan.
Naduktalan ti team a nagtaud iti planta ti CIP dagiti small scale miners ti kemikal a nangrugit ken nangbaliw iti maris ti danum iti karayan.
Dinakamatna nga idi nakadanun ti monitoring team sadiay ket nagbalinen a grey ti maris ti danum ken saanen a kas iti sky blue a naalaan iti ladawan ti maseknan nga umili sadiay.
Innayonna a posible a makasuan iti panaglabsing iti Clean Water Act dagiti agtagikua iti planta a nangrugit iti karayan malaksid pay kadagiti dadduma a pannusa ken multa nga ipataw to ti EMB-Pollution Adjudication Board.
Naamuan a nagala ti team iti sample ti danum tapnu maadal ti cyanide concentration daytoy ken no adda pay ti dadduma a kemikal.
Impasigurado pay ni Digamo a kanayonda a sarungkaran ti nasao a karayan tapnu i-assess ti bilang ti aldaw a napolusyon daytoy gaputa isu ti agbalin a basaran iti maipataw a pannusa.
Innayonna a babaen iti daytoy ket maipasigurado a saanen a mapasamak manen ti nasao a banag nangruna ta atapenna a nabayag a panawen nga ar-aramiden dagiti nasao a minero ti nasao a banag gaputa naduktalan nga awan ti permit ti nasao a planta.
