BAGUIO CITY – Inaklon ti New Peoples Army, partikular ti Leonardo Pacsi Command – NPA Mt Province a dagitoy ti nangpabettak iti Hedcor tapping point sadiay Otucan, Bauko, Mountain Province kas panangdusada iti nasao a kompanya.
Iti waragawag ti nasao a grupo a naipatulod iti Bombo Radyo, kinunada a ginundawayan ti nasao a kompanya ti panagdawat iti tulong ti lokal a gobyerno ti Sabangan kadakuada para iti panakaibangon ti mini-hydro sadiay idi 1989.
Impetteng ti rebelde a grupo a ti laeng Barangays Napua ken Namatec ti nakonsulta para iti proyekto ti kompanya, ken nailaksid ditoy dagiti dadduma pay a komunidad.
Innayunda a saan a nakipaset ti amin a residente iti konsultasyon, ken dagiti laeng opisyales ti gobyerno ken land owners ti immanamong iti daytoy.
Inyakusar pay ti nasao a grupo ti panaglabsing ti Hedcor iti pinirmaanda a katulagan kas iti panangputedda iti adu a kayo, limitado a panangalada iti local workers, ken dadduma pay.
Impettengda nga ipatpatungpalda ti armado a panakilaban ditoy Cordillera tapnu maisardeng dagiti nasao a proyekto ken masalakniban ti nabaknang a natural resources ti rehion.
Kabayatanna, posible a dumanon iti sangapulo ket lima nga aldaw agingga iti duapulo nga aldaw sakbay a maisubli ti normal nga operasyon ti nasao a planta.
Iti panakipatang ti Bombo Radyo kenni Chris Faelnar, senior vice president ti Hedcor Inc., kinunana a gapu iti insidente ket maksayan ti maideliber a power supply iti NGCP Luzon Grid.
Kinunana a gapu iti panagiddep ti planta ket temporaryo met laeng a maisardeng ti panangipaayda iti royalty share iti komunidad ken kadagiti concerned LGUs.
Mainaig iti daytoy ket immapela ni Faelnar kadagiti umili a tumulongda iti panangprotektar iti pasilidad dagitoy gaputa agnumnumarda met laeng iti daytoy.
Impanamnamana met ti panakitinnulongda kadagiti otoridad iti isaysayangkatda nga imbestigasyon.
