BAGUIO CITY – Nakemmegen ti person of interest a maatap a nangbagbagsol iti pimmusay nga engineer sadiay San Carlos Heights, Irisan, Baguio City idi laeng nabiit.
Sigun kenni PSSupt. Ramil Saculles, dadaulo ti Baguio City Police Office (BCPO), adda ti pinirmaanna a travel order para kadagiti personnel ti Station 9.
Kinunana a nagturong dagitoy sadiay Pangasinan a nangkemmeganda iti nasao a person of interest a maysa a taxi driver.
Innayonna nga idi malem kalman ket naiturongen iti BCPO ti nasao nga indibidual ken naipasidong iti umno a proseso, pakairamanan ti panagdamag dagiti pulis kenkuana.
Naamuan a kadua ti suspek dagiti nagannak daytoy.
Maipalagip a kinuna ni PSI Pablo Emmanuel Nead, commander ti BCPO-Station 9 a posible nga ordinaryo nga apa ti rason iti panakabagsol ti biktima a ni Harold Gideon Madallang Chumacog gaputa awan ti natakaw kadagiti aniaman a personal a kagawaan daytoy.
