BAGUIO CITY – Manamnama nga isuko ti Philippine Army ti soldado ti 503rd Infantry Brigade a nangpalpaltog iti dua nga empleyado ti kapitolyo ti Kalinga a nangitunda iti ipupusay ti maysa kadagitoy sadiay Purok 6, Bulanao, Tabuk City, Kalinga idi rabii.
Iti interview ti Bombo Radyo Baguio, kinuna ni PCol. Davey Vicente Limmong, dadaulo ti Kalinga Police Provincial Office nga addan iti ikot ti militar ti suspek a soldado a nabigbig a ni Denmark Baddongon a residente ti Naneng, Tabuk City, Kalinga.
Immunan a nabigbig ti pimmusay a ni Denver Tubban bayat a ti nadangran ket ni Jenner Ewad, agpada a residente ti Tabuk City, Kalinga.
Maibasar iti report, nagturong ti suspek iti Florendo Compound a nakaimet ti paltog ken kinumprontarna ti biktima a ni Denver Tubban para iti panakareimburse ti kwartana a P2,000.
Kinuna met ti testigo a ditoy metten nga imputok ti suspek ti paltogna iti sumagmamano a daras a rason tapnu ballaagan daytoy ni Tubban.
Nupay kasta, maatap a pinalpaltogan ti suspek ni Tubban iti sumagmamano a daras ken maatap a pinalpaltoganna pay ti biktima a ni Ewad a nanggandat a mangtulong kenni Tubban.
Naitaray ni Tubban iti Kalinga Provincial Hospital ngem naideklara daytoy a dead on arrival bayat a naitaray ni Ewad iti Almora General Hospital.
Kinuna met ni Col. Limmong a natalgeden ti kasasaad ni Ewad bayat a naipasidong iti otopsiya ti bangkay ni Tubban.
Innayonna nga adda metten iti ikot ti Philippine Army ni Baddongon ken naamuanda a nakainom daytoy iti arak ken caliber 38 ti inaramat daytoy a paltog iti krimen.
Sigun pay kenkuana, ad-adalenda no adda ti susik iti nagbaetan ti suspek ken dagiti biktima.
