BAGUIO CITY – Nakemmegen ti suspek a nangbagbagsol iti tallo a minero a nakatayan ti maysa sadiay Assumption Road, ditoy siudad ti Baguio City idi parbangon kalman.
Nabigbig ti suspek a ni Ruben Saydawan Feliciano, 23-anyos, baro, helper, tubo ti Mankayan, Benguet ken residente ti Binanga Sur, Tuding, Itogon, Benguet.
Nakemmeg daytoy kalpasan a nabigbig babaen iti narepaso a video footage a naala ti CCTV camera a nakamuntar iti nakapasamakan ti insidente.
Immunan a nabigbig ti pimmusay a biktima a ni James Paul Papay, 21-anyos, baro, tubo ti Talubin, Bontoc, Mt. Province ken residente ti Irisan, Baguio City bayat a dagiti nadangran a kadwana ket da Michael Busacay Baniaga, 21-anyos ken Liam Floyd Busacay Marrero, 19-anyos nga agpada met a residente ti Dalicno, Itogon, Benguet.
Maipalagip a killaat a binagbagsol ti suspek dagiti tallo a biktima kabayatan ti panaguray dagitoy iti taxi iti deppaar ti Assumption Road.
Naamuan a nagtaud dagiti biktima iti maysa a balay paginuman sadiay Mabini Street ken immakar dagitoy iti napasamakan ti insidente.
Naiturong dagiti tallo iti pagagasan ngem saan a nakalasat ni Papay.
Sumangsango metten ni Feliciano iti nagtutuon a kaso ti pammapatay, frustrated homicide ken physical injury. (-with Bombo Brigitte Marcasi)
