BAGUIO CITY – Impannakel ti DepEd Cordillera ti dakkel a nagpintasan ti performance dagiti atleta ti rehion iti Palarong Pambansa 2017.
Segun kenni Georaloy Palao-ay, panakangiwat ti DepEd-Cordillera, iti pakabuklan ket nakagun-od dagitoy iti duapulo ket innem a gold medals, duapulo ket maysa a silver medals ken duapulo ket maysa a bronze medals.
Kinunana a daytoy ti pammaneknek nga impapati dagiti atleta, coaches ken trainers ti kabaelanda tapnu maipakita ti kinapigsa ti Cordillera ken naartapanda pay ti record ti rehion iti tallo a napalabas a tawen ti Palarong Pambansa.
Innayunna a nagbalin a nainget ti laban dagitoy iti Negros Island gaputa idi kalman ket addada iti maikalima a puesto ngem natinnagda iti maikanem a puesto kalpasan a kimmamakam ti nasao a rehion.
Karaman kadagiti ay-ayam a nakagun-odan ti rehion iti gold medals ket ti taekwondo, arnis, archery, athletics, chess ken wushu.
Maipalagip nga idi 2014 ket nagun-od ti delegado ti Cordillera ti maikalima a puesto iti 24 gold medals, 11 silver medals ken 12 bronze medals; maikapat dagitoy idi 2015 iti 24 gold medals, 22 silver medals ken 16 bronze medals bayat a bimmabada iti maikasiyam a puesto idi napalabas a tawen iti 12 gold medals, 19 silver medals ken 15 bronze medals.
