BAGUIO CITY – Naipatungpal ti ‘sipat’ iti nagbaetan ti tribu ti Tongrayan ken Tulgao sadiay Tinglayan, Kalinga idi kalman kasaruno ti tribal conflict iti nagbaetanda gapu iti parikut iti boundary dagitoy itay laeng nabiit.
Iti panakipatang ti Bombo Radyo, inlawlawag ni Cordillera Bodong Administration president Andres Ngao-i a ti ‘sipat’ ti maikonkonsidera a preliminary process ti ‘bodong’ wenno ti peace pact ti Kalinga ken ditoy a nagsinnukat dagiti dua a tribo iti token.
Kinunana a daytoy met ti mangirugi iti ceasefire wenno kappia iti nagbaetan ti dua a tribo ken nawayan nga agkakadua dagiti miyembro dagiti dua a tribo.
Kalpasanna ket ipatungpal ti dua a tribo ti ‘singlib’ wenno ti umuna nga addang iti ‘bodong’ ken ditoy a pagsasaritaanda dagiti mabalin a solusyon iti boundary dispute dagitoy.
Kinunana a mangisingasing ti tunggal tribo iti mabalin a solusyon agingga nga adda ti mabukel a solusyon para iti nasao a parikut.
Dinakamat ni Ngao-i a posible a maituding ti ‘singlib’ inton sumaruno a lawas.
Innayonna a no addan ti mabukel a solusyon ket maipatungpalen ti ‘inom’ a mangileppas iti proseso ti katulagan kappia ken ditoy a maaddaan iti pestibidad wenno panagrambak.
