BAGUIO CITY – Naadaan manen iti engkwentro dagiti kameng ti 50th Infantry Battalion ken ti New Peoples Army iti naminduwa a daras idi kalman sadiay Balbalasang, Balbalan, Kalinga.
Napasamak ti rinnupak iti ala una ti malem ken alas tres ti malem.
Iti panakiuman ti Bombo Radyo kenni Captain James Taguic, operations officer ti 503rd Infantry Brigade, ti nasao nga engkwentro ket kasaruno pay laeng ti manhunt operations nga insayangkat ti tropa dagitoy kalpasan ti immuna nga engkwentro dagitoy iti nasao metlaeng a grupo idi sabado.
Patienda met a ti nakarinnupak dagitoy ket kameng ti Kilusang Larangang Guerilla wenno ti KLG Baggas nga addaan iti operasyon iti nasao a probinsya.
Maipalagip a naaddaan iti rinupak dagiti kameng ti 50th Infantry Batallion ken dagiti NPA idi sabado iti kapada a lugar iti las-ud ti 30 a minuto a nangitunda iti panakadangran ti maysa a soldado ken ipupusay ti maysa nga NPA.
Nabigbig ti pimmusay nga NPA a ni Rudy Miguel a miyembro ti Squad Uno, Marcial Daggay Command, KLG Baggas ken nakammasayag ita ti bangkayna sadiay Bonnong, Brgy. Wagud, Pinukpuk, Kalinga.
