BAGUIO CITY – Umap-apela iti tulong ti kapamilya ti dua a natataengan a pimmusay ken uppat nga ubbing a nadangran iti panangdalapos kadakuada ti maysa nga SUV sadiay Kennon Road, partikular iti Camp 4, Tuba, Benguet idi kalman.
Immunan a nabigbig dagiti pimmusay a da Sioning Pimiliw, 75-anyos ken Rosaline Alberto, 71-anyos bayat a nabigbig dagiti nadangran nga apo dagitoy a da Clara Valencia, 17-anyos; Ian Valencia, 16-anyos; Aedan Ruvic Viloria, 6-anyos ken ti 18-mos. old a ni Sofia Angela Carbonell, bin-ig a residente ti Canubas, Camp 4, Tuba, Benguet.
Sigun kenni Nathaniel Viloria, ama ti maysa kadagiti nadangran nga ubbing, naamuanda a naglibas manipud iti pagagasan ti driver ti SUV a nabigbig a ni Bernard Soriano.
Kinunana nga inaklon dagiti pulis ti Tuba PNP nga am-ammo dagitoy ti driver ti nasao a lugan ken ikagkagumaan dagitoy a sapulen no sadinto ti posible a nagturagan daytoy.
Kabayatanna, naiyakaren iti Notre Dame Hospital dagiti uppat nga ubbing pakairamanan ti anak daytoy gapu kadagiti nagduduma a dunor a nasagrap dagitoy.
Kinuna ni Viloria a malamlamayan met ita sadiay Bahay Damayan ti dua nga baket a dagus a pimmusay iti aksidente.
Maipalagip nga iti report ti pulisya ket agur-uray dagiti biktima iti paglugananda paturong iti siudad ti Baguio idi aksidente a dinalapos dagitoy ti SUV a paturong met iti siudad ti Baguio nga imanmaneho ni Soriano.
