BAGUIO CITY – Temporaryo a naipasidong iti Category Orange iti election hotspots ti uppat a munisipyo sadiay probinsia ti Abra para iti masungad a May 2022 National and Local Elections.
Imbinglay daytoy ni Atty. Ricardo Lampac, Provincial Election Supervisor ti Abra iti panakiuman ti Bombo Radyo Baguio kenkuana.
Saanna met nga innanagan dagiti nasao a munisipyo gaputa sigun kenkuana ket manarimaan ti beripikasyon ken manamnama a rumwar ti resulta inton sumaruno a lawas.
Inlawlawagna pay a ti panakainayon dagiti uppat a munisipyo iti Category Orange ti election hotspots ket tapnu mapakadaan dagiti posible a mapasamak ken makapagsagana ti pulisya ken militar nga agbantay.
Naamuan a dua ti basaran ti panakaipasidong ti maysa a lugar iti Category Orange ti election hotspots a pakairamanan ti kaadda ti nakaro a political rivalry ken ti posibilidad nga adda ti tumaod a riribuk gapu iti daytoy.
Iti baet daytoy, impasigurado ni Atty. Lampac nga iti agdama ket natalna paylaeng ti pakabuklan ti Abra ken awan pay dagiti nailista nga election-related incidents malaksid laeng iti dua a natiliw a naglabsing iti election gun ban.
Sigun pay kenkuana, nakapatangnan ti pulisya ken militar sadiay Abra ken sadiay a naamuan nga ad-adu a pulis ti naidestino sadiay nga agbantay iti masungad nga eleksion.
Innayonna nga adda metten ti kari ti pulisya sadiay nga aramidenda ti trabahoda tapnu agbalin a natalna ken naannayas ti agbalin a panagbotos sadiay.
Pinagyamanan pay ni Atty. Lampac ti kaadda dagiti cause-oriented groups sadiay Abra a tumultulong iti pulisya ken militar iti panakaipatungpal dagiti polisiya para iti linak ken kappia kabayatan ti eleksion.
