BAGUIO CITY – Naapektaran iti African Swine Fever (ASF) virus ti uppat a munisipyo ti Abra pakairaman ti Boliney, Malibcong, Daguioman ken Tineg.
Maibasar iti report, immuna a natamaan ti municipyo ti Boliney iti ASF no sadino dumanon iti sangapulo ket siyam a baboy ti natay kalpasan a nangiyawid iti alingo ti maysa a residente ti Danac East.
Nagresulta daytoy iti panakaipasidong iti nainkapilitan a panakapapatay ti dumanon 355 a baboy iti nasao a municipyo tapno malapdan ti karkaro a panagwaras ti nasao a virus.
Gapu iti daytoy, nangipaulog ni Abra Governor Joy Bernos ti executive order a mangipawpawil iti panakaibiahe dagiti taraken a baboy pastrek ken paruar iti masakupanna a probinsiya.
Imbilin a metlaeng ti makalawas a panagmonitor ken panangimbestigar kadagiti pagtaraknan ti baboy tapno maipasidong iti de-population dagiti naapektaran a barangay.
