BAGUIO CITY- Natiliw ti uppat nga indibidual sadiay Ifugao iti agtultuloy nga operasyon dagiti kapulisan kontra iti panagsugal.
Nabigbig dagiti suspek a da Danny Ringor Dulnuan, 33-anyos; Robert Tuguinay Ringor, 42-anyos; Joseph Ray Abaga Gaerlan, 41-anyos ken Francisco Ringor Dulnuan, 37-anyos.
Nakemmeg dagitoy sadiay Brgy. Poblacion, West, Lamut Ifugao itay nabiit kalpasan a maaktoan ti panagsugalda itay nabiit.
Maibasar iti report ti Ifugao Police Provincial Office, nakaawatda ti impormasyon mainaig iti iligal nga small town lottery wenno pasugalan nga agop-operate iti nasao nga lugar.
Dagus a nangipatungpal ti validation ken operation dagiti pulis a nagresulta iti panakatiliw dagitoy ken panakakumpiskar dagiti nagduduma nga gambling paraphernalia ken P11,450.
Sumangsango ita dagiti suspek iti kaso a panaglabsing iti Presidential Decree 1602 wenno ti Illlegal Gambling Law.
